出道10年新聞多！吳千語踩入網紅界 無懼網上批評：人非幾個標籤就可以形容
吳千語（Karena）17歲出道，因為人氣急升而成為娛樂新聞常客，那時候，她還只是20出頭的少女，卻要面對種種報道與抨擊。這10年來她從未放棄，即使身上背負多個標籤，仍在演藝路上全速前進。以下就由當事人親自解話，這些標籤背後的真相。
出道早成名快 吳千語：我覺得自己好幸運
▲Miu Miu格紋針織外套、連身裙及閃石胸針
因為起步早，不經不覺已在娛樂圈打滾10年的Karena，也不禁慨嘆時間過得太快。
「人愈大時間真係過得愈快！以前細個，係會每日count住時間幾時完，而家反而覺得時間過得太快，好多嘢都做唔切。我呢10年間都過得好充實，完成咗好多想做嘅，又或者經歷咗啲冇諗過要經歷嘅。10年真係唔短嘅時間，但真係過得好快。」
▲Louis Vuitton黑色拼橙色連身裙；Lanvin酒紅色皮革長靴及金屬唇膏造型耳環
一入行就成功，Karena令不少追夢人眼紅，但對於她來說，紅得快壓力大，真的是她想要的嗎？
「整體嚟講，我都覺得自己好幸運。但人真係唔可以同其他人去比較，亦唔可以後悔，過去會有啲嘢做得唔夠好、冇做到應該做嘅嘢⋯⋯冇得後悔就唯有由今日開始做。」過去面對的戀愛風波、身世之謎等種種緋聞，造就了Karena的心理成長，如今面對各種風言風語，她有一套淡定的處理方法。
「其實我唔會睇返啲留言。因為好嘅留言，睇完個人難免會飄飄然，唔好嘅又會令我唔開心喎，咁睇嚟做咩呢？」雖然對留言批評無感，但Karena也不會無視粉絲對她的關心；遇上有人寫下長篇留言，她也非常感激。
「有人會喺我嘅社交媒體上發問，或者關心我嘅情況，對於呢類真心嘅留言，我都會回答。」曾經有人留言指出她說話時的缺點及改善方法，最後她也照單全收，更跟着對方意見改進。
離港拍劇 強化獨立自主個性
▲Louis Vuitton黑色拼橙色連身裙；Prada白色皮革拼銀色AirPods case手鐲；Lanvin金屬唇膏造型耳環
多套賀歲片的成功，令Karena成功打入內地市場，近年也到過不同的城市工作，每次有新job，少不免離港幾個月，也造成了她愈漸獨立的生活。
▲Bottega Veneta青綠色拼啡黑色針織流蘇連身裙
「喺內地嘅生活其實好規律，但一定會少咗時間留喺屋企，同屋企人見面或者係照顧家中嘅寵物等等。始終又未做人呀媽，或者有其他責任喺身，仲可以話去邊就去邊、去幾耐就幾耐。我都享受喺唔同嘅地方生活，始終有啲體驗，係要趁你仲係一個人嘅時候做，當你有咗家庭責任，就唔再一樣。」
眼見身邊不少已為人妻人母的演員，為家庭作出了不少犧牲，Karena也決定把握好自由生活，多接拍長劇，即使要離港多長時間也不怕。
自學拍片 挑戰網紅世界
▲Miu Miu格紋針織外套、連身裙、閃石胸針及黑色皮革拼窩釘鞋
入行10年除了經歷過大風大浪，Karena也親自見證了新媒體的興起，眼見現在愈來愈多網紅跨界踏入娛樂圈，她認為藝人也應該一同進步，嘗試透過不同平台拉近與粉絲的距離，反過來變成「網紅」，與觀眾分享自己的日常生活。
「以前嘅藝人，多數喺報紙雜誌出現，但呢啲都係人哋嘅platform。而家嘅網絡世界，每個人都可以有自己嘅voice，人哋睇你，係睇緊你自己個人，而唔係透過第3者角度去了解你，所以我而家都有好多嘢要學，例如點樣呈現自己想表達嘅訊息。」
▲吳千語：「每個人應該多元化，非幾個字就可以形容。人嘅感情咁複雜，點可以只用4、5個詞語去形容呢？」
為了讓觀眾看到100%真實的吳千語，她由拍攝、剪接、配樂、後期製作等統統親力親為。
「人哋唔會知你想capture邊段內容、想表達啲咩，唯有自己一手一腳做，先可以控制到output。但剪片真係好難，我剪一條幾分鐘嘅片，都要用兩日full day。」
雖說行業本來就不應存在高低之分，但仍有不了人認為網紅最終目標也是成名，踏入演藝圈。現在Karena反其道而行，多招一個「網紅」標籤上身，又會否怕引來另一波的負面批評？
「其實而家網紅嘅力量好大，佢哋好有說服力。好似佢哋主持嘅網購直播，真係好犀利，我都會跟住佢哋買嘢。佢哋就好似金牌sales，佢講完你就會想買。呢個模式，以後都會一直存在。而且今時今日有邊個artist唔使做埋網絡？個世界變緊，你就要跟住佢變，如果唔係你就係退步。」
從入廚學會不勉強不執着
在Karena日常分享的影片、相片中，不難發現她對美食的追求。「食嘢都算係興趣嚟，有啲人真係冇呢種興趣，同埋我自己又鍾意煮嘢食，有時我食到一樣好味嘅嘢，都會研究下點煮。」
因為生長於廣東家庭，身邊不乏烹飪達人，造成她從小「為食」的個性，也令她不經不覺間愛上了下廚。「我覺得佢哋對食係好有追求，可能因為咁，對我都有影響。」
▲Prada灰色拼黑色串珠背心、紫色背心恤衫及深藍色領呔；Philippe Audibert三層金屬戒指及Kenneth Jay Lane圓形金屬戒指All from Lane Cawford
在烹飪的過程中，她更學會了放下對完美的執着，順應事情本身發展，尋覓到他人從未發現的方法。
「有次我浸隻雞，當我拎出嚟時，雞髀的位置仲係生嘅，但雞胸就啱啱好。從此我就學識將雞髀同雞胸分開浸。有時就係要試，先會搵到新發現。呢啲都係人哋教唔到，甚至上網都搵唔到嘅秘方。但喺嘗試嘅過程，你就可以學習、摸索得到。」
這更令她發現，過分追求完美，只會是人生路上的絆腳石。「我以前一係唔做，一做就要完美。但後來有朋友話我：『呢個世界冇最好，只有愈做愈好。』當時我就覺得好有道理，人唔應該驚做唔到最好就唔去做⋯⋯一定要試下挑戰，件事先會愈做愈好。」
無懼標籤定型 最想成為開心果
因為敢於嘗試，Karena參與的新作題材變得更廣泛。在劇集《熟女強人》中，更初次挑戰雙性戀角色，一改過去嬌柔女生的印象。她更指出，她的終極目標並非要有多大的成就，反而是成為一個”Fun to Watch”，人人都會喜歡的開心果。
「大家鍾意睇一個人，一定有原因，可能佢好好笑、可能佢講嘅嘢有用⋯⋯無論係咩原因，我都想人哋睇完我嘅作品會覺得開心、得意。因為我都只係想娛樂下大家，有好多嘢，真係唔需要咁認真。」
資料來源:yahoo.hk
